អន្តរជាតិ៖ នាយកគ្រប់គ្រងទស្សនាវដ្ដីអនឡាញ Frontier Myanmar លោក Danny Fenster អាយុ៣៧ឆ្នាំ ត្រូវបានតុលាការយោធាមីយ៉ាន់ម៉ា សម្រេចផ្តន្ទាទោសឱ្យជាប់ពន្ធនាគារ១១ឆ្នាំ ក្រោមបទចោទញុះញង់ បំពានច្បាប់អន្តោប្រវេសន៍ និងច្បាប់សមាគមដែលមិនស្របច្បាប់។

និពន្ធនាយក Frontier Myanmar លោក Thomas Kean បាននិយាយថា តុលាការបានកាត់ទោសលោក Danny ដោយគ្មានមូលដ្ឋានពិតប្រាកដនោះទេ។

លោកថា៖ «គ្រប់គ្នានៅ Frontier មានការខកចិត្ត និងខកចិត្តចំពោះការសម្រេចចិត្តនេះ។ យើងគ្រាន់តែចង់ឃើញ Danny ត្រូវបានដោះលែងឱ្យឆាប់តាមដែលអាចធ្វើទៅបាន ដូច្នេះគាត់អាចត្រលប់ទៅផ្ទះវិញដើម្បីគ្រួសាររបស់គាត់»។

ក្រៅពីការផ្តន្ទាទោសនេះ លោក Danny ក៏រងនូវការចោទប្រកាន់ថ្មីកាលដើមសប្តាហ៍ដែលធ្ងន់ធ្ងរជាងនេះ ពាក់ព័ន្ធនឹងអំពីបះបោរ និងរំលោភលើអំពើភេរវកម្មដែលប្រឈមការផ្តន្ទាទោសដាក់ពន្ធនាគារអតិបរមា ២០ឆ្នាំ។

ស្ថានទូតអាមេរិកប្រចាំប្រទេសមីយ៉ាន់ម៉ា មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ខណៈអ្នកនាំពាក្យក្រុមប្រឹក្សាយោធាកំពុងកាន់អំណាចក៏មិនអាចទាក់ទងដើម្បីបញ្ជាក់បានដែរ។

លោក Danny Fenster ត្រូវបានចាប់ខ្លួនខណៈពេលដែលព្យាយាមចាកចេញពីប្រទេសមីយ៉ាន់ម៉ាកាលពីខែឧសភា ហើយចាប់តាំងពីពេលនោះមកត្រូវបានឃុំខ្លួននៅក្នុងពន្ធនាគារ Insein របស់ទីក្រុង Yangon ។

ប្រទេសមីយ៉ាន់ម៉ាបានស្ថិតក្នុងភាពវឹកវរចាប់តាំងពីរដ្ឋប្រហារយោធាកាលពីខែកុម្ភៈ ដែលបានបណ្តេញចេញពីរដ្ឋាភិបាលជាប់ឆ្នោតរបស់លោកស្រី អង់សាន ស៊ូជី៕